A Fundación Jacobea inicia a súa andaina co desexo de poñer o seu traballo ao servizo da promoción e defensa das vías de peregrinación, en particular dos Camiños de Santiago, xerando proxectos e intervencións que contribúan á mellora da súa contorna social e cultural.
A institución nace coa intención de defender e promover os valores e filosofía consubstanciais ás peregrinacións ao longo da historia, pero tamén moi ligada á realidade do século XXI, cunha vocación internacional e interdisciplinar e un compromiso decidido coa investigación e a innovación do noso tempo.
MISIÓN
A Fundación Jacobea nace co obxecto de promocionar o patrimonio cultural, artístico e histórico, a defensa do medioambiente e a promoción do desenvolvemento local -social e económico- no marco dos Camiños de Peregrinación, facendo especial énfase nas Rutas Xacobeas e na súa internalización a través da profesionalización do turismo.
FINS E VALORES
A atención ao patrimonio cultural dos itinerarios de peregrinación do Camiño de Santiago, tanto material como inmaterial, e o apoio aos novos talentos artísticos, no marco destes itinerarios.
A promoción, fomento e xestión de servizos e estruturas para a atención e acollida dos peregrinos e visitantes dos Camiños de Santiago, tratando de respectar os principios de accesibilidade universal.
O impulso das TIC aplicadas e dirixidas ao desenvolvemento sustentable.
A formación de voluntarios e figuras profesionais para a acollida, mantemento e desenvolvemento turístico-cultural dos itinerarios de peregrinación.
A promoción e desenvolvemento dos valores propios da peregrinación: constancia, austeridade, esforzo, afán de superación, e racionalización á hora da toma de decisións. Así como o intercambio de experiencias na acollida e promoción dos Camiños de Santiago.
A mellora da calidade de vida das persoas, especialmente da infancia e da mocidade, utilizando o “Know how” da Fundación e dos seus colaboradores.
